2022-nji ýylyň 9-njy sentýabrynda hormatly Prezidentimiz Serdar  Berdimuhamedow Türkmenistanyň Ministrler Kabinetiniň nobatdaky mejlisini geçirdi. Mejlisde şu ýylyň sekiz aýynda alnyp barlan işleriň netijelerine seredilip, Garaşsyz Türkmenistany durmuş-ykdysady taýdan ösdürmegiň möhüm wezipeleri ara alnyp mashatlaşyldy. Ministrler Kabinetiniň Başlygynyň orunbasarlarynyň hasabatlary diňlenildi we bu döwürde amala aşyrylan işlere baha berildi. Onda ýurdumyzyň Ministrler Kabinetiniň Başlygynyň degişli orunbasary öz gözegçilik edýän gurluşyk, senagat we gurluşyk önümçiligi, energetika pudaklary, «Türkmenhimiýa» döwlet konserni,  Awtomobil ýollarynyň gurluşygyny dolandyrmak baradaky döwlet agentligi  hem-de Aşgabat şäheriniň häkimligi tarapyndan sekiz aýyň dowamynda ýerine ýetirilen işleriň  netijeleri hakynda hormatly Prezidentimize hasabat berdi.

Mälim bolşy ýaly, Türkmenistanyň Senagat we gurluşyk önümçiligi ministrliginde ýurdumyzda alnyp barylýan giň gerimli gurluşyklary gurluşyk önümleri bilen üpjün etmek, önümleriň çykarylýan möçberini we görnüşlerini artdyryp, ýurdumyzyň senagat we gurluşyk önümçiligi pudagyny ösdürmek hem-de daşary ýurtlardan getirilýän gurluşyk harytlarynyň ornuny tutýan önümleri ýurdumyzda öndürmek, şeýle-de daşary ýurtlara eksport edilýän önümleriň möçberini artdyrmak boýunça ähli zerur çäreler görülýär. 

2022-nji ýylyň sekiz aýynda Türkmenistanyň Senagat we gurluşyk önümçiligi ministrligi boýunça jemi öndürilen önümleriň we ýerine ýetirilen işleriň meýilnamasy 165,3 göterim ýerine ýetirildi, ösüş depgini hem 133 göterime barabar boldy. 

Tutuş ministrlik boýunça şeýle uly zähmet üstünlikleriniň gazanylmagyna onuň garamagyndaky edara-kärhanalar mynasyp goşantlaryny goşdular. Hasabat döwründe «Bäherden» sement zawody boýunça önümleriň öndürilişi 108,1 göterim, ösüş depgini 182,3 göterim, «Balkan» sement zawody boýunça  öndürilen önümiň meýilnamasy 101,4 göterim, ösüş depgini hem 514,7 göterim ýerine ýetirildi. «Lebap» sement zawodynyň iş meýilnamasy 105,7 göterim ýerine ýetirildi we 156,7 göterim ösüş gazanyldy. Aşgabat şäheriniň «Demirbetonönümleri» kärhanasynda meýilnama 111,6 göterim ýerine ýetirilen bolsa, ösüş depgini 122,7 göterime deň boldy. Büzmeýin etrabyndaky «Demirbetonönümleri» kärhanasynda önümleriň öndürilişi 165,8 göterime we  ösüş depgini 166,5 göterime barabar boldy. Marynyň «Demirbetonönümleri» kärhanasynda bu görkezijiler degişlilikde 116,2 göterime we 118,5 göterime deň boldy. Zerger «Demirbetonönümleri» zawodynda meýilnama 104,5 göterime, ösüş depgini hem 159,8 göterime barabar boldy. Bu ugurda «Polimer önümleri» zawodynda meýilnama 106 göterim ýerine ýetirilip, 172,2 göterim ösüş gazanyldy. Sekiz aýyň jemi boýunça «Türkmendemirönümleri» döwlet kärhanasynda önümleriň öndürilişi 108,8 göterime, ösüş depgini hem 160 göterime deň boldy. Ministrligiň «Zarba» ýöriteleşdirilen döwlet kärhanasy boýunça meýilnama degişli döwürde 116,4 göterim ýerine ýetirildi we 109,5 göterim ösüş gazanyldy, «Türkmenmermer» ýapyk görnüşli paýdarlar jemgyýeti boýunça gurlusyk üçin bezeg serişdeleriniň öndürilişi 105,7 göterime, ösüş depgini hem 103,5 göterime barabar boldy. «Senagattaslama» taslama institutynda meýilnama 106,8 göterim ýerine ýetirildi. Ösüş depgini hem 114,1 göterime deň boldy. 

Ýurdumyzyň Senagat we gurluşyk önümçiligi ministrliginiň işgärleri tutanýerli zähmet çekip, mundan beýläk hem hormatly Prezidentimiziň öňde goýýan wezipelerini we kabul eden maksatnamalaryny ýerine ýetirmek,  gurluşyk önümçiligi pudagyny ösdürmek ugrunda yhlasly zähmet çekip, «Halkyň Arkadagly zamanasy» ýylynda  Garaşsyzlygymyzyň şanly 31 ýyllyk  toýuny ýokary zähmet üstünlikleri bilen garşy almak üçin uly işleri durmuşa geçirjekdigine ynanýarys.