Hormatly Prezidentimiz Serdar Berdimuhamedow 2022-nji ýylyň 2-nji sentýabrynda sanly ulgam arkaly Türkmenistanyň Ministrler Kabinetiniň nobatdaky mejlisini geçirdi. Mejlisde garalan ýurdumyzyň döwlet durmuşynyň ileri tutulýan meseleleriniň hatarynda Türkmenistanyň Senagat we gurluşyk önümçiligi ministrliginiň «Türkmendemirönümleri» döwlet kärhanasynda düýpli abatlaýyş-bejeriş işlerini geçirmek hem-de bu işler üçin zerur bolan serişdeleri satyn almak meselesine hem seredildi. 

Ministrler Kabinetiniň Başlygynyň orunbasary Ç. Purçekow bu ugurda ministrlikde geçirilen açyk görnüşli halkara bäsleşiginiň netijeleri barada hormatly Prezidentimize hasabat berdi. Onda bäsleşigiň jemleri boýunça Senagatçylar we telekeçiler birleşmesiniň agzasy bolan «Dost gurluşyk, söwda, önümçilik» hojalyk jemgyýetiniň teklibiniň has amatly hasaplanandygy barada habar berildi. Şunuň bilen baglylykda, döwlet Baştutanymyzyň garamagyna şu hojalyk jemgyýeti bilen degişli şertnamany baglaşmak baradaky teklip hödürlenildi. 

Hormatly Prezidentimiz beýan edilen teklibi makullap, ýurdumyzda isleg bildirilýän gurluşyk serişdelerini öndürmäge ýöriteleşdirilen iri kärhanalaryň bökdeçsiz işlemegini üpjün etmegiň wajypdygyna aýratyn ünsi çekdi. 

Berkarar döwletiň täze eýýamynyň Galkynyşy döwründe hormatly Prezidentimiziň baştutanlygynda ýurdumyzyň senagat we gurluşyk önümçiligi pudagynda döwrebap özgertmeler yzygiderli durmuşa geçirilýär, ulgamda täze, häzirki zaman önümçilik kärhanalary  gurulýar hem-de  ozal hereket edýän kärhanalary döwrebaplaşdyrmak, olaryň önümçilik kuwwatlyklaryny artdyrmak,  alnyp barylýan giň gerimli gurluşyklary gurluşyk önümleri bilen ýeterlik derejede üpjün etmek, import we eksport ugurly innowasion tehnologiýalara esaslanýan önümleriň önümçiligini ýola goýmak wezipeleri üstünlikli amala aşyrylýar. 

Gurluşyk önümçiligi pudagynyň möhüm ugurlarynyň biri-de demir önümçiligidir. Ýurdumyzda bu önümleri öndürýän ýeke-täk kärhana bolan «Türkmendemirönümleri» döwlet kärhanasy 2009-njy ýylda Gahryman Arkadagymyz Gurbanguly Berdimuhamedowyň hut özüniň ak pata bermegi bilen açyldy. Kärhana demir önümlerine bolan islegi kanagatlandyrmak üçin häzirki döwürde netijeli işleri amala aşyrýar. Kärhanada dürli ölçegli, hil ülňülerine laýyk gelýän armaturalar öndürilip, olar sarp edijilere bökdençsiz ugradylýar. 

Kärhananyň agzybir işgärleri Gahryman Arkadagymyza, Arkadagly Serdarymyza jan saglyk, uzak ömür, il-ýurt bähbitli tutumly işleriniň hemişe rowaç bolmagyny arzuw edip, ýurdumyzyň senagat we gurluşyk önümçiligi pudagynyň işgärleri barada edýän çäksiz aladalaryna jogap edip, mundan beýläk hem has-da tutanýerli we yhlasly zähmet çekmek bilen, döwletimiziň ykdysady kuwwatynyň ýokarlanmagyna, milli senagatymyzyň ösdürilmegine mynasyp goşant goşjakdyklaryna ynandyrýarlar.