2022-nji ýylyň 8-nji iýulynda hormatly Prezidentimiz Serdar Berdimuhamedow Türkmenistanyň Ministrler Kabinetiniň giňişleýin mejlisini geçirdi. Mejlisde şu ýylyň ýanwar — iýun aýlarynda alnyp barlan işleriň netijelerine seredilip, Ministrler Kabinetiniň Başlygynyň orunbasarlarynyň hasabatlary diňlenildi we bu döwürde amala aşyrylan işlere baha berildi, Türkmenistany durmuş-ykdysady taýdan ösdürmegiň möhüm wezipeleri kesgitlenildi. Onda ýurdumyzyň Ministrler Kabinetiniň Başlygynyň degişli orunbasary öz gözegçilik edýän gurluşyk, senagat we energetika toplumlary, «Türkmenhimiýa» döwlet konserni, şonuň ýaly-da Awtomobil ýollarynyň gurluşygyny dolandyrmak baradaky döwlet agentligi tarapyndan şu ýylyň ýanwar — iýun aýlarynda ýerine ýetirilen işleriň netijeleri barada hormatly Prezidentimize hasabat berdi.

Türkmenistanyň Senagat we gurluşyk önümçiligi ministrliginde ýurdymyzda alnyp barylýan giň gerimli gurluşyklary gerek bolan gurluşyk önümleri bilen üpjün etmek, önümleriň çykarylýan möçberini we görnüşlerini artdyrmak, ýurdumyzyň senagat we gurluşyk önümçiligi pudagyny ösdürmek hem-de daşary ýurtlardan getirilýän gurluşyk harytlarynyň ornuny tutýan önümleri öz ýurdumyzda öndürmek, şeýle-de daşary ýurtlara eksport edilýän önümleriň hilini ýokarlandyrmak boýunça ähli zerur bolan işler durmuşa geçirilýär. 

2022-nji ýylyň ýanwar – iýun aýlarynda Türkmenistanyň Senagat we gurluşyk önümçiligi ministrligi boýunça jemi öndürilen önümleriň we ýerine ýetirilen işleriň meýilnamasy 170,4 göterim ýerine ýetirildi. 

Tutuş ministrlik boýunça şeýle uly zähmet üstünlikleriniň gazanylmagyna onuň garamagyndaky edara-kärhanalar mynasyp goşantlaryny goşdular. Hasabat döwründe Büzmeýin etrabynyň «Demirbetonönümleri» kärhanasynda gurnama demirbeton önümleri degişlilikde 139,4 göterim ýerine ýetirildi. «Polimer önümleri» zawodynda turbalaryň öndürilişiniň iş meýilnamasy 112,3 göterim ýerine ýetirildi we 111,3 göterim ösüş gazanyldy. Zerger «Demirbetonönümleri» zawodynda gurnama demirbeton önümleri öndürildi. Meýilnama 105,2 göterim bolan bolsa, onuň ösüş depgini 103,3 göterime deň boldy. «Demir mehaniki» kärhanasynda demir gurnawlarynyň öndürilişi 100,9 göterime we  onuň ösüş depgini  103,1 göterime barabar boldy.

Ministrligiň edara-kärhanalarynda öndürilen önümler we ýerine ýetirilen işler manat görnüşinde alnanda Büzmeýin etrabyndaky «Demirbetonönümleri» kärhanasynda bu görkezijiler degişlilikde 179,6 göterime we ösüş depgini hem 176,9 göterime deň boldy. Aşgabat şäher «Demirbetonönümleri» kärhanasynda meýilnama 122,9 göterim we ösüş depgini 131,6 göterim ýerine ýetirilen bolsa, Mary «Demirbetonönümleri» kärhanasynda meýilnama 122,4 göterim, ösüş depgini 124,9 göterim ýerine ýetirildi. Bu ugurda «Türkmendemirönümleri» döwlet kärhanasynda işler 149 göterim ýerine ýetirilip, 177,9 göterim ösüş gazanylan bolsa, «Polimer önümleri» zawodynda bu görkeziji 109,1 göterime we ösüş depgini 184,3 göterime barabar boldy. «Bäherden» sement zawodynda  meýilnamanyň ýerine ýetirilişi 118,7 göterime deň bolan bolsa, onuň ösüş depgini 176,7 göterime deň boldy. Alty aýyň jemi boýunça «Lebap» sement zawody boýunça iş meýilnamasy 112,7 göterim ýerine ýetirilip, ösüş depgini 140 göterime deň boldy. Zerger «Demirbetonönümleri» zawodynda işler 118,2 göterim ýerine ýetirilip, ösüş depgini hem 186,8 göterime barabar boldy. 

Türkmenistanyň Senagat we gurluşyk önümçiligi ministrliginiň agzybir işgärleriniň mundan beýläk hem hormatly Prezidentimiziň  öňde goýýan wezipelerini we kabul eden maksatnamalaryny ýerine ýetirmek, ýurdumyzyň senagat we gurluşyk önümçiligi pudagyny has-da ösdürmek ugrunda yhlasly zähmet çekip, «Halkyň Arkadagly zamanasy» ýylynda uly dabara bilen bellenilýän döwletimiziň baş baýramyny – Garaşsyzlygymyzyň 31 ýyllyk şanly toýuny uly zähmet sowgatlary bilen garşylajakdyklaryna ynanýarys we olara üstünlikleriň ýar bolmagyny arzuw edýäris.