Hormatly Prezidentimiziň ýurdumyzyň ykdysadyýetini diwersifikasiýa ýoly bilen ösdürmek babatda alyp barýan öňdengörüjilikli ykdysady strategiýasynyň esasynda ýurdumyzda uly ösüşler gazanylýar we Garaşsyz döwletimiz senagat taýdan ösen döwletleriň hataryna ynamly goşulýar. Munuň şeýledigine ýurdumyzyň sebitlerinde gurulýan iri senagat desgalary hem aýdyň subutnamadyr. Netijede senagat pudagyny ösdürmek we daşary ýurtlardan getirilýän harytlaryň ornuny tutýan önümleri öndürmek boýunça döwlet maksatnamalary üstünlikli amala aşyrylýar, pudak boýunça ileri tutulýan önümçilikleriň çagi has-da giňeldilýär. 

Berkarar döwletiň täze eýýýamynyň Galkynyşy döwründe  ýurdumyzy ykdysady taýdan has-da ösdürmek, çüýşe önümçiliginiň kuwwatyny artdyrmak, şeýle hem «Türkmenistanyň Senagat we gurluşyk önümçiligi ministrliginiň 2020 — 2023-nji ýyllarda senagat we önümçilik desgalaryny gurmagy hakynda» Türkmenistanyň Prezidentiniň 2020-nji ýylyň 20-nji fewralynda çykaran Kararyny ýerine ýetirmek maksady bilen, 2022-nji ýylyň 29-njy iýulynda Türkmenistanyň Prezidentiniň gol çeken resminamasyna laýyklykda, Senagat we gurluşyk önümçiligi ministrligine Ahal welaýatynyň Gökdepe etrabynda her gije-gündiziň dowamynda 100 tonna çüýşe önümlerini öndürýän önümhananyň taslamasyny düzmek we ony ýanaşyk ýerleri abadanlaşdyryp gurmak barada «Rysgally zähmet» hususy kärhanasy bilen şertnamany elektrik, aragatnaşyk, gaz, suw üpjünçiliginiň we lagymyň meýdançadan daşarky eltiji inženerçilik ulgamlaryny gurmak şertinde baglaşmaga ygtyýar berildi. 

Gurluşyk işlerine 2022-nji ýylyň iýul aýynda başlamak we önümhanany 2025-nji ýylyň iýul aýynda ulanmaga doly taýýar edip tabşyrmak bellenildi. Elbetde, täze guruljak önümhana Türkmenistanyň Senagat we gurluşyk önümçiligi ministrliginiň «Türkmen aýna önümleri» kärhanasynda öndürilýän çüýşe önümleriniň üstüni ýetirer. Çüýşe önümlerini öndürýän önümhananyň önümçilik ulgamlarynda dürli ölçegli medisina çüýşe önümleri, konserwirlenen we beýleki azyk önümleri üçin niýetlenen çüýşeleri öndürmek göz öňünde tutulýar. Bu önümhananyň önümçiliginiň çig maly hökmünde, esasan, ýerli serişdelerimiz ulanylar. Şeýle hem önümhananyň işe girizilmegi bilen ildeşlerimiz üçin 100-150 iş orunlary dörediler.