Berkarar döwletiň täze eýýamynyň Galkynyşy döwründe hormatly Prezidentimiz Serdar Berdimuhamedowyň baştutanlygynda ýurdumyzyň milli senagatyny ösdürmek, halk hojalygynyň esasy ulgamlarynyň biri bolan senagat we gurluşyk önümçiligi pudagynda  täze döwrebap  önümçilik kärhanalaryny  gurmak  we ozal  hereket edýän kärhanalary döwrebaplaşdyrmak, olaryň önümçilik kuwwatlyklaryny yzygiderli artdyrmak, daşary ýurtlardan getirilýän harytlaryň ornuny tutýan önümçilikleri döretmek hem-de pudagyň eksport mümkinçiliklerini ýokarlandyrmak, sanly ykdysadyýeti pudaga ornaşdyrmak, innowasion tehnologiýaly önümleriň önümçiligini ýola goýmak wezipeleri üstünlikli amala aşyrylýar. Munuň üçin Arkadagly Serdarymyzyň taýsyz tagallalary netijesinde döwletimiz tarapyndan hemaýat-goldaw berilýär, bu pudaga uly maýa goýumlary gönükdirilýär hem-de ähli zerur bolan mümkinçilikler we şertler döredilýär. 

«Halkyň Arkadagly zamanasy» ýylynyň 26-njy awgustynda hormatly Prezidentimiziň sanly ulgam arkaly geçiren Türkmenistanyň Ministrler Kabinetiniň nobatdaky mejlisinde ýurdumyzy durmuş-ykdysady taýdan ösdürmegiň Maksatnamasyny ýerine ýetirmek bilen baglanyşykly meseleler ara alnyp maslahatlaşyldy hem-de halkymyzyň ýaşaýyş-durmuş derejesiniň yzygiderli ýokarlandyrylmagyna gönükdirilen birnäçe meselelere garaldy. 

Mejlisde Ministrler Kabinetiniň Başlygynyň orunbasary Ç.Purçekow Senagat we gurluşyk önümçiligi ministrliginiň sement zawodlarynyň önümçilik kuwwatyny artdyrmak boýunça geçirilýän işler barada hasabat berdi. Onda ýurdumyzda alnyp barylýan giň  gerimli gurluşyk desgalary, dürli pudaklary hem-de ilaty ýokary hilli gurluşyk serişdeleri we önümleri bilen ýeterlik derejede üpjün etmek boýunça bu ministrligiň öňünde goýulýan wezipelere laýyklykda, garamagyndaky kärhanalaryň bökdençsiz işlemegi üçin ähli zerur çäreleriň görülýändigi bellenildi. 

Hormatly Prezidentimiz Ministrler Kabinetiniň Başlygynyň orunbasarynyň hasabatyny diňläp, içerki sarp edijileri ýokary hilli gurluşyk serişdeleri, şol sanda ýurdumyzda öndürilýän sement önümi bilen doly üpjün etmegiň zerurdygyna ýene bir gezek ünsi çekdi. Döwlet Baştutanymyz pudagyň kärhanalarynyň önümçilik kuwwatyny yzygiderli artdyrmagyň hem-de bu ugurda alnyp barylýan işleri doly seljermegiň wajypdygyny aýdyp, degişli görkezmeleri berdi.

Soňky döwürde zawodlaryň önümçilik kuwwatyny talaba laýyk derejede saklamak maksady bilen, «Bäherden», «Balkan» sement zawodlarynda düýpli abatlaýyş-bejeriş işleri geçirildi. Şeýle hem «Lebap» sement zawodynda enjamlaryň bölekleýin abatlaýyş-bejeriş işleri ýerine ýetirildi. 

Bulardan başga-da, häzirki wagtda ministrlik tarapyndan sement zawodlaryny zerur bolan oda çydamly we sarp ediş materiallary, şeýle hem ätiýaçlyk şaýlary bilen üpjün etmek boýunça açyk görnüşli halkara bäsleşikleri geçirilýär. 

Häzirki günde «Berkarar döwletiň täze eýýamynyň Galkynyşy: Türkmenistany 2022 – 2052-nji ýyllarda durmuş-ykdysady taýdan ösdürmegiň Milli maksatnamasyna» hem-de Türkmenistanyň Prezidentiniň «Türkmenistanyň Senagat we gurluşyk önümçiligi ministrliginiň 2020 – 2023-nji ýyllarda senagat we önümçilik desgalaryny gurmagy hakynda» Kararyna laýyklykda, ýurdumyzyň welaýatlarynyň etraplarynda we şäherlerinde häzirki zaman döwrebap senagat desgalarynyň gurluşygy, şol sanda Ahal welaýatynyň Bäherden etrabynda hem-de Lebap welaýatynyň Köýtendag etrabynda «Bäherden» we «Lebap» sement zawodlarynyň hersi ýylda 1 million tonna sement öndürýän 2-nji tapgyrlarynyň gurluşyk işleri degişlilikde «Beýik-bina» hususy kärhanasy we «Türkmen enjam» hojalyk jemgyýeti tarapyndan güýçli depginde alnyp barylýar.

 Biz Türkmenistanyň Senagat we gurluşyk önümçiligi ministrliginiň agzybir işgärleriniň Arkadagly Serdarymyzyň beren tabşyryklaryny doly ýerine ýetirjekdiklerine ynanýarys. Döwlet maksatnamalarynyň, hormatly Prezidentimiziň çykarýan möhüm kararlarynyň we berýän tabşyryklarynyň üstünlikli amala aşyrylmagy bolsa, ýurdumyzyň ykdysady kuwwatyny has-da artdyrmaga hem-de türkmen halkynyň ýaşaýyş-durmuş derejesini ýokarlandyrmaga uly goşant bolar hem-de diňe bir gurluşyk önümçiligi pudagyny däl, eýsem, tutuş köpugurly milli senagatymyzyň ösdürilmegine itergi berer.