Berkarar döwletiň täze eýýamynyň Galkynyşy döwründe Garaşsyz, hemişelik Bitarap döwletimizde baýramçylyklaryň öň ýanynda täze desgalary, binalary ulanyşa girizmek asylly däbe öwrüldi. Şanly Garaşsyzlygymyzyň 31 ýyllygy bellenilýän «Halkyň Arkadagly zamanasy» ýylynda Arkadagly Serdarymyzyň tagallasy bilen ýurdumyzyň ähli künjeginde dürli maksatly binalar, döwrebap ýaşaýyş jaýlary, bilim we medeniýet ulgamynyň desgalary, halk hojalygynyň iri kärhanalary we beýlekiler gurlup ulanmaga berilýär. Bu uly möçberli gurluşyklaryň alnyp barylmagynyň esasy ugurlary ilkinji nobatda mähriban halkymyzyň amatly ýaşaýyş we durmuş şertlerini üpjün etmekden, eziz Diýarymyzy gülledip ösdürmekden ybaratdyr. 

Mukaddes Garaşsyzlygymyzyň 31 ýyllygynyň ruhubelentlik bilen giňden baýram edilýän günlerinde halkymyzyň baş baýramyna bagyşlanyp ýurdumyzda birnäçe ajaýyp, döwrebap binalaryň açylyş dabaralary boldy. Bu desgalaryň 352 maşgala niýetlenen 86 sanysynyň Türkmenistanyň Senagat we gurluşyk önümçiligi ministrliginiň Aşgabat şäheriniň «Demirbetonönümleri» kärhanasynyň, Zerger «Demirbetonönümleri» zawodynyň, Türkmenabat şäherindäki «Demirbetonönümleri» we «Demirbetonkonstruksiýa» kärhanalarynyň zähmetsöýer hünärmenleri tarapyndan gurlup ulanmaga berlendigi guwandyryjy ýagdaýdyr. Bu demirbeton önümlerini öndürýän kärhanalaryň gurluşyk önümleri öz alyp barýan gurluşyklarynda giňden ulanylýar we beýleki gurluşyk edaralaryna hem-de telekeçilere ýerlenilýär. 

22-nji sentýabrda Balkanabat şäherinde her biri 40 hojalyga niýetlenen     2 sany 4 gatly, ähli amatlyklary bolan döwrebap ýaşaýyş jaýlarynyň açylyş dabaralary boldy. Balkan welaýat Polisiýa müdirliginiň düzümleriniň işgärleri üçin Balkanabat şäher häkimliginiň buýurmasy esasynda ministrligiň Zerger «Demirbetonönümleri» zawodynyň ussat gurluşykçylary tarapyndan gurlan täze jaýlaryň Garaşsyzlyk baýramynyň bellenilýän günlerinde açylmagy bagtyýar maşgalalaryň toý şatlygyny goşalandyrdy. 

Şeýle baýramçylyk dabaralary ýurdumyzyň Ahal we Lebap welaýatlarynda hem uly şatlyk-şagalaňa beslenmek bilen geçirildi.

24-nji sentýabrda Lebap welaýatynyň Türkmenabat şäheriniň Halkara howa menziline barýan ýoluň ugrunda kottej jaýlarynyň açylyp ulanmaga berilmegine bagyşlanan çäreler geçirildi. 100 maşgala niýetlenen iki gatly 100 sany kottej jaýlarynyň 80-isi hem Türkmenistanyň Senagat we gurluşyk önümçiligi ministrliginiň kärhanalarynyň, has takygy Zerger «Demirbetonönümleri» zawodynyň ezber gurluşykçylarynyň guran 30 sany, Türkmenabat şäherindäki «Demirbetonönümleri» kärhanasynyň guran 30 sany we «Demirbetonkonstruksiýa» kärhanasynyň guran 20 sany döwrebap binalarydyr.

Şeýle hem şol gün Aşgabat şäheriniň «Demirbetonönümleri» kärhanasynyň hünärmenleriniň Ahal welaýatynyň Ak bugdaý etrabynyň Magtymguly geňeşliginiň çäginde guran 4 sany 4 gatly, 48 öýli ýaşaýyş jaýlarynyň hem açylyş dabaralary boldy.   

Görkezilen täze ýaşaýyş jaýlarynyň açylyş dabaralarynda çykyş edenler bu ýere ýygnananlary «Halkyň Arkadagly zamanasy» ýylynyň ruhuna mynasyp buýsançly waka bilen gyzgyn mübäreklediler hem-de täze öýlere göçüp gelen bagtyýar maşgalalara abadançylyk, rowaçlyk arzuw etdiler.  Aýratyn hem ähli amatlyklary bolan täze jaýlara göçüp gelmek bagty miýesser eden maşgalalaryň agzalary halkymyzyň ýaşaýyş we durmuş derejesiniň ýokarlanmagy bilen baglanyşykly meselelere yzygiderli üns berýändigi üçin Arkadagly Serdarymyza tüýs ýürekden çykýan hoşallyk sözlerini aýtdylar. Olar döwlet Baştutanymyza berk jan saglyk, halkymyzyň hem-de Watanymyzyň abadançylygynyň bähbitlerine alyp barýan giň möçberli işlerinde uly üstünlikleri arzuw etdiler. 

Şeýle hem täze ýaşaýyş jaýlaryň açylyş dabaralary mynasybetli guralan medeni-köpçülikleýin çäreleriň dowamynda gurluşyk işlerinde has tapawutlanan işgärlere hormatly Prezidentimiziň adyndan gymmat bahaly sowgatlar gowşuryldy.