Berkarar döwletiň täze eýýamynyň Galkynyşy döwründe Hormatly Prezidentimiziň taýsyz tagallalary netijesinde milli ykdysadyýetimiziň ähli pudaklaryny sanlylaşdyrmak arkaly ösdürmäge gönükdirilen tutumly işler amala aşyrylýar hem-de bu möhüm çäreleriň çäklerinde, maglumat telekommunikasiýa tehnologiýalarynyň howpsuz we ygtybarly dolandyrylmagyna döwlet derejesinde uly ähmiýet berilýär.  

Ýurdumyzyň halk hojalygynyň beýleki ulgamlary bilen bir hatarda ýurdumyzyň senagat we gurluşyk önümçiligi pudagyny ösdürmek, önümçilige sanly ulgamy ornaşdyrmak ugrunda giň gerimli işleri alyp barmakda innowasion tehnologiýalardan oňat baş çykarýan ýokary derejeli hünärmenlere uly orun degişlidir.  

Türkmenistanyň Prezidentiniň 2022-nji ýylyň 2-nji martyndaky Karary bilen tassyklanan «Türkmenistanyň kiberhowpsuzlygyny üpjün etmegiň 2022 – 2025-nji ýyllar üçin Döwlet maksatnamasyny amala aşyrmak boýunça ýerine ýetirilmeli çäreleriň Meýilnamasyna» laýyklykda 2022-nji ýylyň 29-njy aprelinde Türkmenistanyň Senagat we gurluşyk önümçiligi ministrliginde garamagyndaky edara-kärhanalarynyň hünärmenleriniň gatnaşmagynda kiberhowpsuzlyk boýunça bäsleşik geçirildi.  

Döwrüň ösen talaplaryndan ugur alnyp geçirilen bu bäsleşikde 1-nji orny eýelän «Lebap» sement zawodynyň Ölçeg barlag enjamlary we awtomatika sehiniň elektronika inženeri N.Narmatowa hem-de degişlilikde 2-nji we 3-nji orny eýelän «Türkmen aýna önümleri» kärhanasynyň Ölçeg barlag enjamlary we awtomatika bölüminiň maglumatlary goramak boýunça inženeri A.Bäşimow hem-de «Bäherden» sement zawodynyň Ölçeg barlag enjamlary we awtomatika sehiniň başlygy S.Meretdurdyýew Türkmenistanyň Bilim ministrligi tarapyndan Türkmenistanda maglumat howpsuzlygy boýunça 2022-nji ýylyň 18-nji iýunynda Gurluşyk we senagat toplumynyň işgärleriniň arasynda geçirilen «Kiberbäsleşigiň» 2-nji tapgyryna hem-de 2022-nji ýylyň 25-nji oktýabrynda «Sanly Çözgüt – IT meýdançasynda» ýurdumyz boýunça geçirilen 3-nji tapgyryna gatnaşyp, bilim we hünär ussatlyklaryny görkezmek bilen öňdäki orunlara mynasyp bolmagy başardylar.  

2022-nji ýylyň 31-nji oktýabrynda Türkmenistanyň Senagat we gurluşyk önümçiligi ministrliginiň merkezi edarasynda «Kiberbäsleşigiň» ähli tapgyrlaryna işjeň gatnaşyp, oňat netijeleri gazanmak bilen öňdäki orunlary eýelän hünärmenleri sylaglamak dabarasy boldy hem-de olara Hormat hatlary we hormatly Prezidentimiziň adyndan gymmat bahaly sowgatlar gowşuryldy.