Türkmenistanyň Senagat we gurluşyk önümçiligi ministrliginiň «Türkmen aýna önümleri» kärhanasy Ahal welaýatynyň Gökdepe etrabynyň Owadandepe senagat zolagynda gurlup, 2018-nji ýylyň 14-nji fewralynda Gahryman Arkadagymyzyň ak pata bermegi bilen dabaraly ýagdaýda açylyp, ulanmaga girizildi. 

«Türkmen aýna önümleri» kärhanasy döwrebap kärhanalaryň biridir. Bu kärhanada her ýylda float usulyndaky dury aýnanyň 4 millimetr galyňlykdaky şertli ölçegde 7 million 200 müň inedördül metrini, taplanan aýnanyň 300 müň inedördül metrini, örtükli aýnalaryň 1 million inedördül metrini, aýna paketleriniň 400 müň inedördül metrini we laminirlenen aýnanyň hem 100 müň inedördül metrini, şeýle-de 14 müň 400 tonna çüýşe gaplaryny öndürmäge mümkinçiligi bar. 

Häzirki zamanyň kämil enjamlary oturdylan we ähli işler kuwwatly tehnologiýalaryň kömegi bilen awtomatlaşdyrylan usulda merkezi dolandyryş bölüminden amala aşyrylýan bu döwrebap kärhanada ýerli çig malyň hasabyna öndürilýän aýna önümleri we çüýşe gaplary hiliniň ýokarylygy we görnüşiniň köplügi bilen tapawutlanýar. Dünýä ülňülerine laýyk gelýän düz aýna önümleri alnyp barylýan gurluşyklarda giňden ulanylýar, öndürilýän dürli görnüşli çüýşe gaplaryň aglaba bölegi azyk senagatynda, saglygy goraýyş we derman senagaty pudagynda hem-de ykdysadyýetiň döwlete dahylsyz pudagynda iş alyp barýan kärhanalar tarapyndan berlen sargytlar we buýurmalar esasynda öndürilýär hem-de olar bu önümleri öz işlerinde ulanýarlar.

Sebitde deňi-taýy bolmadyk «Türkmen aýna önümleri» kärhanasynyň aýna önümleri gysga wagtyň dowamynda içerki we daşarky bazarlarda uly meşhurlyga hem islege eýe boldy we olar sarp edijiler üçin elýeterlidir. Olar diňe bir içerki sarp edijilere ýerlenilmän, Ukraina, Özbegistan, Täjigistan, Gyrgyzystan  Respublikalaryna, Owganystan Yslam Respublikasyna hem eksport edilýär. Bu bolsa türkmen aýnasyna gyzyklanmanyň uludygynyň subutnamasydyr.   

«Türkmen aýna önümleri» kärhanasynyň önümleri bilen şu salgydan has giňişleýin tanyşmak bolar: Ahal welaýatynyň Gökdepe etrabynyň Owadandepe geňeşliginiň Aşgabat – Daşoguz gara ýolunyň 22-nji kilometri.

Habarlaşmak üçin telefon belgisi: (+993 12) 52-24-44; faks (+993 12) 52-24-43

Elektron poçtasynyň salgysy: tak@online.tm