2024-nji ýylyň 20-nji fewralynda Türkmenistanyň Senagat we gurluşyk önümçiligi ministrliginiň hem-de Türkmenistanyň Kärdeşler arkalaşyklarynyň Milli merkeziniň Gurluşyk we senagat işgärleriniň Kärdeşler arkalaşygy geňeşiniň bilelikde guramagynda hem-de şu ýylyň dowamynda Gündogaryň beýik akyldary we nusgawy şahyry Magtymguly Pyragynyň doglan gününiň 300 ýyllygyny dabaraly bellemek boýunça ministrlikde geçirilmeli çäreleriň Meýilnamasyna laýyklykda, Türkmenistanyň Senagat toplumynyň edara binasynyň mejlisler jaýynda «Magtymguly – geçmişimiz, şu günümiz we geljegimiz» atly wagyz-nesihat çäresi geçirildi.

Çärä Gurluşyk we senagat işgärleriniň Kärdeşler arkalaşygy geňeşiniň başlygy Rahmandurdy Rahmanow, Türkmenistanyň Ylymlar akademiýasynyň Taryh we arheologiýa institutynyň uly ylmy işgäri Atageldi Nepesow, «Türkmenistanyň gurluşygy we binagärligi» jemgyýetçilik-syýasy we ylmy žurnalynyň bölüm redaktory Atamyrat Şagulyýew, «Türkmenistanyň senagaty» žurnalynyň redaksiýasy bölüminiň başlygynyň wezipesini wagtlaýyn ýerine ýetiriji Abdylhalyk Džumatow, Türkmenistanyň «Hormatly il ýaşulusy» Erkin Kösäýew, Aşgabat şäheriniň ýaşaýjysy, il sylagly ýaşuly Mälik Meredow, Aşgabat şäheriniň 42-nji orta mekdebiniň mugallymy, zähmet weterany Turana Kurbanowa, Arkadag şäheriniň Maliýe we ykdysadyýet müdirliginiň esasy hünärmeni Parahat Meretliýew hem-de ministrligiň merkezi edarasynyň we garamagyndaky edara-kärhanalaryň işgärleri  gatnaşdylar.  

Duşuşygyň dowamynda çykyşlara giň orun berlip, olarda döredijiligi Jemşidiň jamyna deňelýän Magtymguly Pyragy milletimiziň buýsanjydyr, onuň umman ýaly giň döredijiligi halkymyzyň ruhy baýlygydyr, bütin adamzadyň gymmatly hazynasydyr. Çünki beýik akyldaryň döredijiligi bütin adamzady agzybirlige, jebislige, ynsanperwerlige çagyrýar diýlip bellenildi. 

Taryhyň sahypalaryna altyn harplar bilen ýazylýan Berkarar döwletiň täze eýýamynyň Galkynyşy döwrüniň biri-birinden şöhratly gelýän ajaýyp ýyllarynyň şanly wakalaryny ýatlanyňda gahryman Arkadagymyzyň, hormatly Prezidentimiziň taýsyz tagallalary bilen gazanylan Watanymyzyň beýik ösüşlerine bolan guwanjyň, buýsanjyň artýar. 

Beýik şahyryň doglan gününiň 300 ýyllygy uludan toýlanjak     2024-nji ýyl – «Pähim-paýhas ummany Magtymguly Pyragy» ýyly hem ilkinji günlerinden taryhy wakalara, uly üstünliklere beslenip geldi. Çärede şu şanly ýylyň akyldar şahyryň ady bilen baglanyşdyrylyp, şeýle hem Gahryman Arkadagymyzyň jöwher paýhasyndan syzylyp çykan ajaýyp şygryndan ruhlanyp, «Pähim-paýhas ummany Magtymguly Pyragy» ýyly   diýlip yglan edilmeginiň ildeşlerimizde gyzgyn goldaw tapandygy, beýik söz ussadynyň ömür ýolunyň, edebi mirasynyň, tutuş adamzat aňyýetiniň kämilleşmegini nazarlaýan eserleriniň terbiýeçilik ähmiýeti bilen baglanyşykly buýsançly çykyşlar boldy.           

Çykyş edenler Magtymguly Pyragynyň edebi mirasy we şygyrlarynyň terbiýeçilik ähmiýeti, täze taryhy döwrümizde dana şahyra goýulýan hormat-sarpa dogrusynda gürrüň etdiler. Olar bu gün akyldar şahyrymyz Magtymguly Pyragynyň garaşsyz döwlet, erkinlik, ynsanperwerlik hakyndaky arzuw-islegleriniň hasyl bolandygyny, şirin dilli söz ussadymyzyň çuňňur pähim-paýhasa ýugrulan, kämil many-mazmunly goşgularynyň ýaş nesilleri watansöýüjilik ruhunda terbiýelemekde möhüm ähmiýete eýedigini, ildeşlerimizi halal zähmete, belent maksatlara ruhlandyrýandygyny aýratyn bellediler. Çärede şahyryň edebi mirasy, akyl-paýhasa ýugrulan ajaýyp eserleri belent adamkärçiligiň, ylahy päkligiň, ahlagyň, mertligiň, salykatlylygyň, watançylygyň, ynsabyň ölçeg daşy bolup, türkmen halkynyň arasynda ýaşap gelýär diýlip bellenilmegi, oňa gatnaşyjylarda uly täsir galdyrdy. 

Wagyz-nesihat çäresinde çykyş edenler Gündogar edebiýatynyň parlak ýyldyzy, türkmeniň beýik akyldar şahyry Magtymguly Pyragynyň edebi mirasyny öwrenmek, onuň dünýä dolan şöhratyny has-da beýgeltmek ugrundaky tagallalary üçin hormatly Prezidentimiziň we Milli Liderimiziň adyna alkyş sözlerini aýtdylar. 

Maslahatyň barşynda wagyz-nesihat çäresine gatnaşanlar çykyş eden myhmanlara Magtymguly Pyragynyň ömri we döredijiligi, häzirki günde beýik şahyryň doglan gününiň 300 ýyllygyny bellemek boýunça alnyp barylan işler barada özlerini gyzyklandyrýan sowallar bilen ýüzlenip, degerli jogaplary aldylar.