Hormatly Prezidentimiziň: «Ýurdumyz döredijiligiň we üstünlikleriň ýoly bilen ynamly öňe barýar. Ähli ugurlarda gazanylýan üstünlikler halkymyzyň ýaşaýyş-durmuş derejesiniň yzygiderli ýokarlanmagyna oňaýly täsirini ýetirip, geljege ynamyny has-da berkidýär» diýip belleýşi ýaly, Türkmenistanyň Senagat we gurluşyk önümçiligi ministrligi hem-de onuň garamagyndaky edara-kärhanalary hem milli ykdysadyýetimiziň yzygiderli ösdürilmegine öz mynasyp goşantlaryny goşýarlar. Berkarar döwletimiziň bagtyýarlyk döwrüniň  «Türkmenistan — parahatçylygyň we ynanyşmagyň Watany» ýylynda ministrlik we onuň edara-kärhanalary oňat netijeleri görkezýär. 2021-nji ýylyň ýanwar — mart aýlarynda ministrlik boýunça jemi öndürilen önümleriň we ýerine ýetirilen işleriň ösüşi 118,5 göterime barabar boldy.

Aýratyn hem «Polimer önümleri» zawodynda öndürilen önümiň we ýerine ýetirilen işleriň meýilnamasy 210,1 göterim ýerine ýetirildi we 206,3 göterim ösüş depgini gazanyldy. Ministrligiň Büzmeýin etrabyndaky «Demirbetonönümleri» kärhanasynda bu görkezijiler degişlilikde 180,3 we 144,9 göterime, Mary «Demirbetonönümleri» kärhanasynda 150,7 we 137,8 göterime, Balkan kän müdirliginde 137,5 we 139,2 göterime, Daşoguz şäheriniň «Demirbetonönümleri» zawodynda 130,4 we 153,5 göterime barabar boldy.

Häzirki wagtda ministrligiň we onuň garamagyndaky edara-kärhanalaryň zähmetsöýer işgärleri hormatly Prezidentimiziň  özlerine bildirýän ynamyny aňryýany bilen ödemek, çykarýan Kararlaryny doly ýerine ýetirmek, ýurdumyzyň senagat we gurluşyk önümçiligi pudagyny mundan beýläk hem ösdürmek, mukaddes Garaşsyzlygymyzyň 30 ýyllyk baýramyny we gözel paýtagtymyzyň 140 ýyllyk toýuny mynasyp zähmet sowgatlary bilen garşylamak üçin her bir gününi öndürijilikli zähmet netijeleri bilen jemleýärler.