Mukaddes Garaşsyzlygymyzyň şanly 33 ýyllyk baýramynyň öňüsyrasynda, sentýabr aýynyň 10-11-inde ak şäherimiz Aşgabatda Türkmenistanyň maýa goýum forumynyň, ýurdumyzyň ykdysadyýetine ýokary tehnologiýalary we innowasiýalary çekmek boýunça halkara maslahatynyň hem-de serginiň guralmagy eziz halkymyzyň baýramçylyk şatlygyna şatlyk goşdy. 

Foruma dünýaniň abraýly bilermenleri, öňdebaryjy milli we halkara nebitgaz, energetika, gurluşyk, ulag-kommunikasiýa kompaniýalarynyň, halkara guramalaryň, maliýe düzümleriniň, ylmy merkezleriň ýolbaşçylarydyr wekilleri, şeýle hem türkmen tarapyndan ministrlikleriň, pudaklaýyn dolandyryş edaralarynyň, banklaryň, Senagatçylar we telekeçiler birleşmesiniň ýolbaşçylary gatnaşdylar. 

Hormatly Prezidentimiz Serdar Berdimuhamedowyň maýa goýum forumynda sanly ulgam arkaly çykyş etmegi onuň täsirini has-da artdyrdy. Arkadagly Gahryman Serdarymyz Garaşsyz Türkmenistanda halkara maslahatlary, sergileri, festiwallary, işewürlik duşuşyklaryny geçirmegiň asylly däbe öwrülendigini nygtap, milli ykdysatyýetimize iri möçberli maýa goýumlary çekmekde, özara bähbitli halkara hyzmatdaşlygyň gerimini giňeltmekde bu çäreleriň uly ähmiýete eýe bolýandygyny belledi. 

Döwlet Baştutanymyzyň nygtaýşy ýaly, durnukly ykdysady ösüşi gazanmak biziň baş maksadymyz bolup durýar. Şoňa görä-de, ykdysadyýetimiziň ähli ugurlaryny gurşap alýan maksatnamalarymyz üstünlikli amala aşyrylýar. Türkmenistanda iri maýa goýum taslamalary durmuşa geçirildi. Şolaryň arasynda Türkmenistan – Hytaý gaz geçirijisini, Ahal welaýatynda tebigy gazdan benzin öndürýän zawody, Balkan welaýatynda polietilen we polipropilen öndürýän gazhimiýa toplumyny hem-de “Garabogazkarbamid” zawodyny görkezmek bolar. Arkadagly Gahryman Serdarymyz foruma gatnaşyjy daşary ýurtly wekilleri Türkmenistanda nebitgaz, himiýa, energetika, ulag-aragatnaşyk, oba hojalyk pudaklarynda durmuşa geçirilýän taslamalara gatnaşmaga çagyrdy. Hormatly Prezidentimiziň çykyşy uly üns bilen diňlenildi. 

Arkadagly Gahryman Serdarymyzyň baştutanlygynda ýurdumyzda maýa goýum syýasatynyň yzygiderli kämilleşdirilmegi, döwrebaplaşdyrylmagy bilen, milli ykdysadyýetiň, şeýle-de sebitiň we dünýäniň döwletleriniň arasyndaky maliýe-ykdysady hem-de beýleki ugurlar boýunça gatnaşyklaryň durnukly, sazlaşykly, kadaly ösüşi üpjün edilýär. Her ýyl üçin maýa goýum maksatnamasy işlenip düzülende, onuň anyk wezipeleri kesgitlenilýär, önümçilikde we durmuş ulgamynda meýilleşdirilýän sepgitler anyklanylýar. 

Türkmenistanyň maýa goýum forumy we ugurdaş sergi, şeýle hem ýurduň ykdysadyýetine ýokary tehnologiýalary we innowasiýalary çekmek boýunça halkara maslahat maýadarlar, daşary ýurtly işewür hyzmatdaşlar we Türkmenistanda özara bähbitli hyzmatdaşlygy ýola goýmak isleýän kompaniýalar bilen halkara ykdysady gatnaşyklary pugtalandyrmak, maýa goýum mümkinçiliklerini giňeltmek, ýokary netijeli maýa goýum taslamalary üçin daşary ýurt maýadarlaryny çekmek, türkmen işewürleriniň innowasion tehnologiýalar pudagynda halkara hyzmatdaşlygyny işjeňleşdirmek üçin möhüm ähmiýetli meýdança öwrüldi. 

Türkmenistanyň maýa goýum forumynyň dowamynda oňa gatnaşyjylar bu ýerde ýaýbaňlandyrylan giň gerimli sergi bilen tanyşdylar. Sergi ýurdumyzyň ykdysadyýetiniň pudaklarynyň eksport mümkinçiliklerini, daşary ýurt maýadarlarynyň geljegi uly türkmen bazarynda eýeleýän ornuny berkitmäge bolan gyzyklanmalaryny artdyrmak, halkara hyzmatdaşlygyny yzygiderli işjeňleşdirmek ugrunda ägirt uly mümkinçilikleriň bardygyny görkezdi. 

Forumyň umumy mejlisinde çykyşlar giňden ýaýbaňlandyryldy. Çykyşlarda bellenilişi ýaly, häzirki döwürde ýurdumyzda Gahryman Arkadagymyzyň başyny başlan beýik işleriniň Arkadagly Gahryman Serdarymyzyň parasatly baştutanlygynda üstünlikli durmuşa geçirilmegi netijesinde maýa goýum işini alyp barmak üçin ähli zerur şertler döredilýär.