2024-nji – «Pähim-paýhas ummany Magtymguly Pyragy» ýylynyň 3-5-nji noýabrynda gözel paýtagtymyzda «Türkmenistanyň gurluşygy, senagaty, energetikasy — 2024» atly halkara sergisi we «Türkmenistanyň gurluşyk, senagat, energetika pudaklarynyň ösüşi» atly maslahat ýokary derejede geçirildi. Serginiň açylyş dabarasyna Hökümet agzalary, ýurdumyzdaky diplomatik wekilhanalaryň hem-de halkara guramalarynyň ýolbaşçylary we beýleki dürli wezipeli işgärleri, jemgyýetçilik gurmalarynyň, habar beriş serişdeleriň wekilleri gatnaşdylar. Türkmenistanyň Söwda-senagat edarasy,  Senagat we gurluşyk önümçiligi ministrligi, «Türkmen energiýa forum» hojalyk jemgyýeti tarapyndan bilelikde guralan, giň gerime eýe bolan serginiň gurluşyk, senagat önümçiligi, energetika hem-de himiýa senagaty, ýol gurluşyk ulgamlarynda eziz Diýarymyzyň gazananlary, belli kompaniýalar tarapyndan hödürlenýän ýöreteleşdirilen enjamlar we beýlekiler oňa gatnaşyjylarda uly gyzyklanma döretdi.

Sergä we maslahata gatnaşyjylar hormatly Prezidentimiz Serdar Berdimuhamedowyň Gutlagyny uly üns bilen diňlediler. Onda häzirki döwürde eziz Watanymyzyň ösüşiň we rowaçlygyň ýoly bilen ynamly gadam urup, dünýäniň kuwwatly, durnukly ösýän döwletleriniň birine öwrülendigi bellenilýär. Milli ykdysadyýetimiziň ähli ulgamlary bilen bir hatarda, gurluşyk we senagat pudagy hem ýokary depginlerde ösýär. Gurluşyk we senagat toplumynda innowasion önümçilikleri döretmek, iri senagat kärhanalaryny gurmak, daşary ýurtlardan getirilýän harytlaryň ornuny tutýan önümçilik kuwwatlyklaryny artdyrmak hem-de pudagyň eksport mümkinçiliklerini ýokarlandyrmak, ulgama sanly ykdysadyýeti ornaşdyrmak wezipeleri üstünlikli çözülýär. Şunuň bilen baglylykda, döwlet Baştutanymyz bu serginiň we maslahatyň türkmen hünärmenleri bilen daşary ýurt kompaniýalarynyň wekilleriniň özara tejribe alyşmagynda, geljekde giň gerimli hyzmatdaşlygy ýola goýmakda, iki tarapa hem bähbitli taslamalary ara alyp maslahatlaşmakda uly ähmiýete eýe boljakdygyna berk ynam bildirdi.

Serginiň iri pawilýonlarynda ýerleşdirilen gurluşyk we senagat toplumynyň beýleki pudaklary bilen bir hatarda, Türkmenistanyň Senagat we gurluşyk önümçiligi ministrliginiň innowasion tehnologiýalar bilen enjamlaşdyrylan häzirki zaman kärhanalarynda öndürilen döwrebap önümler hem serginiň myhmanlarynda uly täsir galdyrdy. Sergide görkezilen gurluşyk önümleri özleriniň ýokary hilliligi we hyrydar söýüjilikliligi bilen tapawutlandy. Olar sergä we maslahata gatnaşyjylaryň ünsüni özüne çekmek bilen, Garaşsyz döwletimiziň ösüşiň we rowaçlygyň ýoly bilen öňe ynamly gadam urýandygyny, ýurdumyzyň dünýäniň kuwwatly hem-de durnukly ösýän döwletleriniň birine öwrülýändigini görkezdi. 

Türkmenistanyň Senagat we gurluşyk önümçiligi ministrliginiň ulgamynda döwletimizi senagat taýdan ösen döwlete öwürmek boýunça gaýragoýulmasyz işler durmuşa geçirilýär. Segide häzirki döwürde ýaýbaňlandyrylýan täze tehnologiýalar, döwrebap innowasion enjamlar bilen abzallaşdyrylan zawodlarymyzyň, kärhanalarymyzyň öndürýän gurluşyk enjamlary sergä gatnaşyjylary we myhmanlary biparh goýmady. Has hem «Bäherden», «Balkan», «Lebap» sement zawodlarynyň önümleri bolan portlandsement hem-de köpri we beýleki gidrotehniki desgalaryň gurluşygy üçin zerur bolan sulfata durnukly sement önümleri gurluşykçylar üçin diýseň derwaýys harytdyr. Bu ýakary hilli dünýä standartlaryna laýyk gelýän sement önümleri  eziz Diýarymyzda gurluşyklary giňden alnyp barylýan Arkadag şäheriniň ikinji tapgyrynda, paýtagtymyzda we welaýatlarda alnyp barylýan gurluşyklar üçin diýseň derwaýyslygy bilen hemmeleriň ünsüni özüne çekýär. Şonuň ýaly-da «Türkmen aýna önümleri» kärhanasynda float usulynda öndürilýän dury aýnanyň 4 millimetr galyňlykdaky görnüşine we taplanan aýna, örtükli, düz, laminirlenen aýnalara, aýna paketlerine, dürli ölçegdäki çüýşe gaplara isleg bildirenler köp boldy. Bulardan başga-da geljekde durmuşa geçirilmegi meýilleşdirilýän taslamalarymyz bolan gün panelini, bazalt süýüminden ýasalan armaturany we ses hem ýylylyk saklaýjy materiallar we beýlekiler sergilendi.

Gurluşyk senagatynyň ösdürilmegi döwlet ösüşiniň möhüm ugurlarynyň biri hökmünde çykyş edýär. Häzirki wagtda ýurdumyzda gurluşyk pudagynyň düzümlerini giňeltmek we döwrebaplaşdyrmak, innowasion tehnologiýalar ornaşdyrylan häzirki zaman kärhanalaryny döretmek, daşary ýurtlardan getirilýän harytlaryň ornuny tutýan, eksport ugurly harytlaryň öndürilýän möçberini artdyrmak boýunça wezipeler üstünlikli çözülýär. Bu ugurda alnyp barylýan maksatnamalaýyn işler netijesinde ilaty we gurluşyklary ýerli çig malyň esasynda öndürilen ýokary hilli senagat önümleri bilen doly üpjün etmäge mümkinçilik döredi. Pudagyň kärhanalarynda sement, magdan däl gurluşyk serişdeleri, diwarlyk paneller, timarlaýyş, gidroizolýasiýa materiallary, metal önümleri, aýna, gurnama demir-beton önümleri, keramzit, kaolin we beýleki gurluşyk serişdeleri öndürilýär. Bildirilýän talaplara laýyklykda, gurulýan desgalarda hem-de olaryň bezeg işlerinde diňe ýokary hilli serişdeler ulanylýar. Olar saýlanyp alnanda, ýurdumyzyň howa şertleri, ekologik kadalara laýyk gelşi, berkligi, ulanyşda amatlylygy göz öňünde tutulýar.

Sergi bilen ugurdaş geçirilen «Türkmenistanyň gurluşyk, senagat, energetika pudaklarynyň ösüşi» atly maslahatyň dowamynda özara bähbitli hyzmatdaşlygyň geljegi uly ugurlary barada giňişleýin pikir alşyldy. Oňa ýurdumyzyň ugurdaş ministrlikleriniň we pudaklaýyn dolandyryş edaralarynyň ýolbaşçylary, türkmen telekeçileri, daşary ýurt kompaniýalarynyň wekilleri gatnaşdylar. Türkmenistanyň gurluşyk, senagat we energetika pudaklarynda täze ösüş meýilleri, daşary ýurtly hyzmatdaşlar bilen hyzmatdaşlygyň geljegi plenar mejlisiň esasy mowzugy boldy.

Bellenilişi ýaly, Gahryman Arkadagymyz tarapyndan başy başlanan giň gerimli maksatnamalaryň Arkadagly Gahryman Serdarymyz tarapyndan üstünlikli durmuşa geçirilmegi netijesinde milli ykdysadyýetimiziň esasy pudaklary okgunly ösüş ýoluna düşdi. Şunuň bilen baglylykda, soňky ýyllarda Türkmenistanyň ykdysady ösüşi ýokary derejelerde saklanýar. Ýurdumyzyň özygtyýarly ösüş ýyllarynda gurluşyk we senagat toplumyny innowasion taýdan ösdürmek hem-de diwersifikasiýalaşdyrmak, onuň kuwwatly infrastrukturasyny kemala getirmek boýunça uly işler bitirildi. Hereket edýän kärhanalary döwrebaplaşdyrmaga, tehniki taýdan gaýtadan enjamlaşdyrmaga, pudagyň ylmy-tehniki binýadyny berkitmäge, oňa netijeli dolandyryş çözgütlerini ornaşdyrmaga aýratyn üns berilýär. 

Halkara sergä we köpugurly foruma gatnaşyjylar hormatly Prezidentimiz Serdar Berdimuhamedowyň adyna Ýüzlenme kabul etdiler. Onda Türkmenistanyň Gurluşyk we senagat toplumynyň işgärleriniň hünär baýramyny geçirmäge beren goldaw-hemaýatlary hem-de toplumyň pudaklarynyň has-da ösdürilmegi we milli ykdysadyýetimiziň mundan beýläk hem kuwwatlanmagy üçin özleriniň tutanýerli we yhlasly zähmeti bilen mynasyp goşant goşmaga döredip berýän mümkinçilikleri we şertleri üçin hormatly Prezidentimiz Arkadagly Gahryman Serdarymyza, türkmen halkynyň Milli Lideri Gahryman Arkadagymyza tüýs ýürekden hoşallyk bildirilip, alkyş sözleri beýan edilýär hem-de olaryň janlarynyň sag, ömürleriniň uzak we berkarar döwletimiziň gülläp ösmegi hem-de mähriban halkymyzyň bagtyýar durmuşda ýaşamagy üçin alyp barýan tutumly işleriniň rowaç bolmagy arzuw edildi.