Berkarar döwletiň täze eýýamynyň Galkynyşy döwründe Garaşsyz, hemişelik Bitarap ýurdumyzda Arkadagly Gahryman Serdarymyzyň taýsyz tagallalary bilen zenan sarpasynyň belentde tutulýandygy, eşretli zamanamyzyň bagtyýar gelin-gyzlaryna okamaga, dürli pudaklarda döredijilikli zähmet çekip, Diýarymyzyň ösüşlerine mynasyp goşant goşmaga ähli mümkinçilikleriň döredilýändigi buýsanç bilen bellenmäge mynasypdyr.

4-nji martda ýurdumyzda giňden bellenilýän Halkara zenanlar gününiň öňüsyrasynda Türkmenistanyň Senagat we gurluşyk önümçiligi ministrliginiň «Türkmendemirönümleri» döwlet kärhanasynyň mejlisler jaýynda mähriban enelerimiziň we eziz uýalarymyzyň, pudakda zähmet çekýän aýal-gyzlaryň baýramyna bagyşlanyp, dabaraly çäre geçirildi. Bu dabarany ministrligiň Kärdeşler arkalaşygynyň ilkinji guramasy gurady we oňa ministrligiň merkezi diwanynyň we garamagyndaky edara-kärhanalaryň işgärleri, olarda zähmet çekýän aýal-gyzlar, Kärdeşler arkalaşyklarynyň Milli merkeziniň Gurluşyk we senagat işgärleriniň kärdeşler arkalaşygynyň Geňeşiniň wekilleri gatnaşdylar.  

 Dabarada edilen çuň mazmunly çykyşlarda Milli Liderimiziň we hormatly Prezidentimiziň türkmen zenanlary barada edýän aladalary, goýýan beýik hormat-sarpalary, milli ykdysadyýetimiziň beýleki pudaklarynda bolşy ýaly, Türkmenistanyň Senagat we gurluşyk önümçiligi ministrliginiň ulgamynda hem aýal-gyzlaryň göreldeli zähmet çekip, ata Watanymyzyň ösüşlerine we ýurdumyzda özgertmeleriň amala aşyrylmagyna, Türkmenistan döwletimiziň senagat taýdan ösen döwlete öwrülmegine mynasyp goşant goşýandyklary bellenildi. Olar çäksiz aladalary üçin Gahryman Arkadagymyza, Arkadagly Gahryman Serdarymyza çuňňur hoşallyklaryny buýsanç bilen beýan etdiler. 

Çäräniň dowamynda «Ak mermer» etnografiýa tansçylar topary çykyş etdi, şeýle hem uzak ýyllaryň dowamynda pudagymyzda göreldeli we yhlasly zähmet çeken aýal-gyzlarymyza Türkmenistanyň Senagat we gurluşyk önümçiligi ministrliginiň hem-de ministrligiň Kärdeşler arkalaşygynyň ilkinji guramasynyň Hormat hatlary we gymmat bahaly sowgatlary gowşuryldy.

Aýratyn hem, Halkara parahatçylyk we ynanyşmak ýylynyň 21-nji fewralynda hormatly Prezidentimiziň ýurdumyzyň aýal-gyzlaryna Halkara zenanlar güni mynasybetli pul sowgadyny bermek hakynda gol çeken buýrugyna laýyklykda, Arkadagly Gahryman Serdarymyzyň adyndan gyz-gelinlere pul sowgatlarynyň gowşurylmagy dabaranyň täsirini has-da artdyrdy.