Berkarar döwletiň täze eýýamynyň Galkynyşy döwründe hormatly Prezidentimiziň taýsyz tagallalary bilen ýurdumyzda senagat we gurluşyk önümçiligi ulgamynyň kuwwatyny ýokarlandyrmak, pudaga innowasion önümçilikleri giňden ornaşdyrmak, senagat kärhanalarynyň hataryny artdyrmak, täze iş orunlaryny döretmek babatda netijeli işler durmuşa geçirilýär. Muňa Halkara parahatçylyk we ynanyşmak ýylynyň 8-nji sentýabrynda döwlet Baştutanymyz Serdar Berdimuhamedowyň gatnaşmagynda paýtagtymyzyň demirgazygyndaky senagat toplumynyň çäginde gurlan çüýşe önümlerini öndürýän önümhananyň dabaraly ýagdaýda açylyp ulanmaga berilmegi aýdyň şaýatlyk edýär. Bir gije-gündiziň dowamynda 100 tonna çüýşe önümlerini öndürmäge niýetlenen kärhana ýurdumyzyň senagat ähmiýetli önümçilik desgalarynyň üstüni ýetirmek bilen, milli ykdysadyýetimiziň sazlaşykly ösüş ýoly bilen ynamly öňe barýandygyny görkezdi. 

  Açylyş dabarasyna ýurdumyzyň ýolbaşçy düzümi, gurluşyk we senagat toplumynyň işgärleri, jemgyýetçilik guramalarynyň, köpçülikleýin habar beriş serişdeleriniň wekilleri, hormatly ýaşulular we ýaş nesliň wekilleri gatnaşdylar. Hormatly Prezidentimiziň dabara gatnaşyjylaryň şowhunly el çarpyşmalary astynda toý bagyny kesmegi ýatda galyjy pursatlaryň biri boldy. Şanly Garaşsyzlygymyzyň 34 ýyllygynyň öňüsyrasynda işe girizilen bu önümhana senagat we gurluşyk önümçiligi pudagynyň yzygiderli ösdürilýändiginiň, dünýäniň öňdebaryjy tehnologik enjamlary ornaşdyrylan senagat kärhanalarynyň yzygiderli gurlup ulanmaga berilýändiginiň, netijede, ýurdumyzda senagat önümleriniň dürli görnüşleriniň önümçiliginiň ýola goýulýandygynyň nobatdaky güwäsine öwrüldi. 

  Desganyň açylyş dabarasynyň dowamynda Arkadagly Gahryman Serdarymyz önümhananyň çäginde guralan ýurdumyzyň gurluşyk we senagat toplumynyň sergisini synlady. Çünki häzirki döwürde «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasyna», «Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyna» laýyklykda, senagat we gurluşyk önümçiligi pudagyny innowasion taýdan hem-de diwersifikasiýa ýoly bilen ösdürmek boýunça işler üstünlikli durmuşa geçirilýär. Bu işler bilen bir hatarda, öndürilýän önümleriň bäsdeşlige ukyplylygyny ýokarlandyrmaga we olaryň görnüşlerini artdyrmaga, senagat kärhanalarynyň önümçilik binýadyny pugtalandyrmaga aýratyn ähmiýet berilýär. Ýurdumyzy senagatlaşdyrmak we daşary ýurtlardan getirilýän harytlaryň ornuny tutýan önümleri öndürmek boýunça amala aşyrylýan döwlet strategiýasynda içerki bazary ýerli çig malyň esasynda öndürilýän dürli görnüşli senagat önümleri bilen üpjün etmek meselelerine uly üns berilýär. Sergide ýaýbaňlandyrylan dürli görnüşli ýerli gurluşyk serişdeleri, senagat harytlary ýokary hil derejesine eýe bolup, degişli ugurda oňyn üstünlikleriň gazanylýandygyny tassyklady. 

 Soňra döwlet Baştutanymyz täze binanyň edara binasyna baryp, «Türkmen aýna önümleri» kärhanasynyň çüýşe önümlerini öndürýän goşmaça önümhanasynyň işine ak pata berdi we ýörite düwmäni basdy. Şol pursat ekranda çüýşe önümlerini öndürýän goşmaça önümhananyň işe girizilendigini aňladýan şekilli görnüşler görkezildi. 

 Önümhananyň gurluşygyny «Rysgally zähmet» hususy kärhanasy ýerine ýetirdi. Täze önümçilik toplumynda göwrümi 5 millilitrden 3000 millilitre çenli dürli ölçegli çüýşeleriň 50 töweregi görnüşi öndüriler. Şolaryň hatarynda azyk önümlerini gaplamak üçin reňkli we reňksiz çüýşelerdir banka önümleri, gaplyk çüýşe önümleri, şeýle hem lukmançylyk serişdeleri üçin gaplyk çüýşeler bar. Umumy meýdany 6 gektara barabar bolan önümhanada çig mallary taýýarlaýan, gaplyk çüýşe önümlerini öndürýän, ýylylyk, gaz we suw üpjünçiligi, mehaniki abatlaýyş sehleri, barlaghana we hil gözegçilik bölümi, şeýle-de taýýar önümler ammary hereket edýär. 

 Italiýa, Germaniýa, Türkiýe döwletleriniň innowasion tehnologik enjamlary ornaşdyrylan döwrebap önümhanada önümçilik üçin kwars çägesi, dolomit, hek daşy, natriý sulfaty, kömür ýaly ýerli çig mallar ulanylar. Bu ýerde işgärleriňdir hünärmenleriň zähmet çekmegi üçin ähli zerur şertler üpjün edilipdir. Ýyllyk kuwwaty 36 müň 500 tonna barabar bolan önümhanada öndüriljek ýokary hilli önümler içerki bazarda sarp edijilere ýetiriler hem-de daşary ýurtlara eksport ediler.  

 Dabarada Germaniýanyň «Horn Glass Industries» kompaniýasynyň we Italiýanyň «Vetromeссaniсa Sri» kompaniýasynyň wekilleri Türkmenistanyň senagat we gurluşyk önümçiligi ministrine täze kärhanada ornaşdyrylan enjamlaryň Germaniýa Federatiw Respublikasynda hereket edýän we halkara derejesinde kabul edilen standartlara laýyk gelýändigi, şeýle hem çüýşe önümlerini öndürýän önümhanada gurnalan tehnologik enjamlaryň hil, daşky gurşaw we howpsuzlyk taýdan halkara standartlaryň kadalaryna laýyk gelýändigini tassyklaýan güwänamalaryny, şeýle hem Italiýanyň «Bottera» kompaniýasynyň halkara standartlaryna laýyk gelýän toplumlaýyn dolandyryş ulgamynyň ornaşdyrylandygyny tassyklaýan güwänamasy gowşuryldy.

  Açylyş dabarasynyň dowamynda Arkadagly Gahryman Serdarymyz «Türkmen aýna önümleri» kärhanasynyň ýolbaşçysyna sowgat hökmünde täze awtoulaglaryň we ýörite tehnikalaryň açarlaryny gowşurdy. 

 Türkmenistanyň Senagat we gurluşyk önümçiligi ministrliginiň «Türkmen aýna önümleri» kärhanasynyň dürli görnüşli we ölçegli çüýşe önümlerini öndürýän goşmaça önümhanasynyň ulanmaga berilmegi ýurdumyzyň mukaddes Garaşsyzlygynyň şanly baýramyna mynasyp toý sowgady boldy.