Hormatly Prezidentimiziň: «Senagat toplumy halk hojalygynyň beýleki pudaklarynyň öňbaşçysy bolmalydyr, çünki ol pudaklaryň geljekki ösüşi üçin binýat bolup durýar» diýip belleýşi ýaly, bu ulgamda düýpli işler durmuşa geçirilýär. Munuň şeýledigi barada şu ýylyň 7-nji maýynda Gahryman Arkadagymyzyň ýolbaşçylygynda geçirilen Türkmenistanyň Ministrler Kabinetiniň mejlisinde hem düýpli gürrüňler  edildi. Onda ýurdumyzyň Ministrler Kabinetiniň Başlygynyň degişli orunbasary 2021-nji ýylyň ýanwar — aprel aýlarynda gurluşyk-senagat toplumynda önüm öndürmek hem hyzmatlary ýerine ýetirmek boýunça meýilnamanyň 129,5 göterim ýerine ýetirilendigi, onda ösüşiň 117,2 göterime barabar bolandygy hakynda hormatly Prezidentimize hasabat berdi. 

 Döwlet Garaşsyzlygymyzyň şanly 30 ýyllygy, Aşgabat şäheriniň hem 140 ýyllygy bellenilýän «Türkmenistan — parahatçylygyň we ynanyşmagyň Watany» ýylynda milli Liderimiziň ýolbaşçylygynda Senagat we gurluşyk önümçiligi ministrligi boýunça önüm öndürmegiň, işleri ýerine ýetirmegiň hem-de hyzmatlar boýunça meýilnamanyň 125,2 göterim ýerine ýetirilendigi, bu babatdaky ösüşiň 119,3 göterime deň bolandygy guwandyryjy ýagdaýlaryň biridir. Dogrusy,  «Sabyr bilen dag ýonýan», zühmet ýeňişlerini özlerine ýar eýleýän adamlaryň köp sanlysy Türkmenistanyň Senagat we gurluşyk önümçiligi ministrliginde, bu ministrligiň garamagyndaky edara-kärhanalarda işleýärler, zühmet çekýärler. Şu ýylyň ýanwar — aprel aýlarynda Senagat we gurluşyk önümçiligi ministrliginiň hem onuň garamagyndaky edara-kärhanalaryň gazanan üstünlikleri, zähmet öndürijiligi bizi diýseň begendirýär. Mysal üçin Kaka kän müdirligi boýunça ýanwar — aprel aýlarynda meýilnama boýunça magdan däl gurluşyk materiallarynyň öndürilişi 125,8 göterime, ösüş depgini 111 göterime barabar, Türkmenabat şäherindäki «Demirbetonkonstruksiýa» kärhanasynda gurnama demir-beton önümleriniň öndürilişi 110 göterime deň bolan bolsa, onuň ösüş depgini 104 göterime barabar boldy. Gazbeton öndürýän zawodda önümiň öndürilişi 135 göterime, ösüş depgini hem 314,5 göterime barabar bolan bolsa, Büzmeýin etrap «Demirbetonönümleri» kärhanasynda meýilnama boýunça işleriň ýerine ýetirilişi 202,5 göterime, ösüş depgini hem 169,4 göterime deň boldy. «Polimer önümleri» zawodynda meýilnama boýunça işleriň ýerine ýetirilişi 228,8 göterime, ösüş depgini hem 216,4 göterime barabar bolan bolsa, «Türkmen aýna önümleri» kärhanasynda meýilnama boýunça işler 135,2 göterim ýerine ýetirildi, onuň ösüş depgini 137,4 göterime deň boldy.  Şeýle uly ösüşler bilen bizi begendirýän edara-kärhanalara mundan beýlägem rowaçlyklaryň ýar bolmagyny arzuw edýäris.